Ministri i Shtetit për Marrëdhëniet me Parlamentin, Taulant Balla ka folur sërish drejt opozitës, gjatë seancës plenare në Kuvend.
Ai i tha me ironi se demokratët kalojnë nga dështimi në dështim me entuziazëm.
“Më vjen mirë që kolegët e listave të mbyllura të PD-së nuk e kanë humbur entuziazmin, më vjen mirë që jeni plot hare e nënqeshje. Meqë Flamuri i ka qejf shprehjet e mençura…”, tha ai nga foltorja.
“Uroj t’ju shtohet jeta se në fund të fundit, jemi vëllezër shqiptarë. Po a mos kujtoni se shqiptarët janë budallenj?”, shtoi Balla.
Më tej, solli në kujtesë koalicionin Aleanca për Shqipërinë Madhështore, duke veçuar emrin e Selami Jenisherin.
Balla tha me ironi se ky i fundit, do të japë ndonjë formulë për të fituar ndeshjen kundër Serbisë.
“Futët brenda vetes edhe kockat që kishin mbetur nga baba Like. Edhe pse futët gjeniun e futbollit ndërkombëtar Selami Jenisherin, të na japë ndonjë formulë për të fituar edhe ndeshjen me Serbinë.
Hej Zot! Edhe ua paskemi ne fajin! Unë e di që strategjia më e mirë për të mos pranuar humbjen, është të mos pranosh rezultatin.
Ju jeni pengje të një mallkimi të madh”, tha Balla.
