Taulant Balla nga Pogradeci i ka dhënë përgjigje aleatëve të Partisë Demokratike në lidhje me propozimin për një tryezë të përbashkët mes mazhorancës dhe opozitës, me qëllim zgjidhjen e krizës. Megjithëse thotë se PS ka qenë e gatshme gjithmonë për dialog, Balla i ka dhënë përgjigje edhe kërkesës për t’u shtyrë zgjedhjet.
“Të jetë e qartë, data e zgjedhjeve nuk ndryshohet nga partitë. Partisë Socialiste nuk mund t’i vendosë kushte askush. Ne kemi qenë gjithmonë të gatshëm për të dialoguar, por më 30 qershor do të zhvillohen zgjedhjet. Nuk do të ketë dialog për t’i vënë shkelmin Kushtetutës”, ka thënë Balla.
Sot kanë qenë kryetarët e PR, PAA, LZHK, PBDNJ dhe PDK që nëpërmjet një platforme me 12 pika, kërkonin zgjidhjen e krizës aktuale politike, ndryshimin e sistemit zgjedhor si edhe ndryshime kushtetuese për kufizimin e mandatit të kryeministrit dhe deputetëve dhe shndërrimin e Parlamentit me dy dhoma, duke përfshirë Senatin./Opinion.al
