Taulant Balla nga foltorja e Parlamentit e ka quajtur Lulzim Bashën si huligan futbolli që nuk e meriton të jetë në atë sallë. Balla tha se për herë të parë deputetë dhe policë po goditen me urdhrat qorre të kryetarit të opozitës, i cili po tenton të nxisë destabilitet.
“Do të doja nga kjo foltore ti drejtohesha personalisht Bashës si nxitësi dhe orkestruesi kryesor i dhunës opozitare sot në Kuvend. Kushdo e mbështet, thjesht vetëm se largon vendin nga Evropa dhe nxit destabilitetin në vend edhe sot teksa deputete e policë mund të goditen nga urdhrat qorre të Bashës. Basha po sillet si huligan në ndeshje futbolli, dhe djegia e mandatit po jua them nuk është fare humbje për demokracinë pasi politikanë të papërgjegjshëm si puna e Bashës as nuk e meritojnë besimin e shqiptarëve dhe as të jenë në Kuvend”, është shprehur Taulant Balla.
Ai gjithashtu dënoi refuzimin e Lulzim Bashës për t’u paraqitur në Prokurori në lidhje me hetimet që po kryen për paratë e lobimit të Partisë Demokratike në Shtetet e Bashkuara të Amerikës. Sipas Taulant Ballës, në Bruksel ishte parashikuar të shkonte Gerti Bogdani, por për t’iu shmangur drejtësisë, Lulzim Basha ndryshoi axhendën dhe iku vetë./Opinion.al
