Ditën e sotme Gjykata e Tiranës ka zhvilluar seancën e radhës për çështjen “Babalja”. Por, debati i ashpër mes ish-deputetit të Partisë Demokratike, Ervin Salianji dhe Ardjan Vishës, avokatit të Agron Xhafajt, ka bërë që kjo seancë të ndërpritet.
Në këtë seancë është thirr dhe gazetari Jetmir Olldashi, cili nuk ka pranuar të shkojë në Gjykatë, ndërsa deklaratën e tij do e japë përmes avokatit të tij.
Salianji është shprehur në Gjykatë se PD ka pasur informacione të vazhdueshme se vëllai i ish-ministrit Xhafaj, Agron Xhafaj, ishte i përfshirë në trafik droge. Po ashtu, ish-deputeti ka thënë se Albert Veliu i ka thënë që ka qenë në rrezik për jetën, dhe sipas Salianjit, prokuroria nuk e ka marrë qëllimisht materialin bruto për të shpëtuar nga akuzat Geron Xhafën.
“Geron Xhafa ishte i dënuar në itali me 7 vite burgim. Lëvizte i lirë. Mora këtë material nga gazetari Jetmir Olldashi, dhe më pas nga Albert Veliu që nuk e njihja më përpara. Olldashi më tha që po bëj investigim të madh në Tetor të 2017-s. Jetmiri me solli një material ku thuhej se vëllai i ish-ministrit Xhafa i favorizuar nga i vëllai kryente trafikun e drogës. Lidhja kryhej nga një person me emrin Ermal që ishte punonjës policie. Ky person do të bënte trafikimin e drogës drejt Italisë. Veliu me ka thënë se jam në risk për jetën dhe ai më ka thënë se për çdo kontakt që bënte me punonjës të institucioneve shtetërore. Nuk kam pasur dyshime se zëri është i Agron Xhafajt dhe këtë e ka faktuar ekspertiza duke thënë se është i ngjashëm. Prokuroria nuk e ka marrë qëllimisht materialin bruto për të shpëtuar Geron Xhafën. Dua të bëj një kallëzim për dëshmi të rreme të shtetasve Albert Nushi dhe Albert Veliu”, tha Salianji.
Ish-deputeti Ervin Salianji akuzohet për “kallzim të rremë” për dosjen “Babalja” së bashku me gazetarin Jetmir Olldashi. PD pretendon se Agron Xhafaj, vëllai i ish-ministrit të Brendshëm, Fatmir Xhafaj, dëgjohet në një audio-përgjim, teksa flet për pazare droge me Albert Veliun, i njohur ndryshe si “Babale”./ Opinion.al E.Xh.
