Kryetari i Partisë Demokratike, Lulzim Basha i ka dërguar një letër ambasadore së SHBA, Yuri Kim, në lidhje me çështjen “Babalja”
Sipas “Top Channel”, Basha shkruan në letër se PD-ja përmes ish-deputetit Ervin Salianjit ka paraqitur prova për përfshirjen e vëllait të ish-ministrit të Brendshëm Fatmir Xhafaj në trafikimin e lëndëve narkotike.
“Pavarësisht këtyre zhvillimeve, nën presionin politik të qeverisë, sistemi drejtësisë dështoi të bëjë dhe përfundojë një hetim për këto krime të dyshuara, përfshi tentativat për t’i mbuluar ato, me përfshirjen e zyrtarëve të lartë të policisë dhe politikanëve nga PS”,-shkruan ndër të tjera Basha.
Po ashtu, lideri i opozitës ka shprehur shqetësimin e tij dhe për gjyqin e zhvilluar ndaj ish-deputetit Salianji dhe gazetarit Jetmir Olldashi. Sipas Bashës, procesi gjyqësor për kallëzim të rremë ishte një shkelje flagrante e ligjit nga ana e gjykatës që, sipas tij, është e lidhur me Qeverinë “Rama”.
Kryedemokrati Basha shpalos edhe shqetësimin për atë që ndodhi me gjyqin e ish deputetit Ervin Salianji.
“ Gjyqi prodhoi shkelje flagrante të ligjit, nga një gjykatës haptas i lidhur me partinë në pushtet duke dënuar përfaqësuesin e PD Ervin Salianji dhe gazetarin investigativ Jetmir Olldashi me akuza absurde për raportime të rreme”,-shprehet Basha.
Po ashtu, kryedemokrati ka dërguar edhe një material përmbledhës për atë që e quan abuzim pushteti dhe presion politik, që ndëshkoi denoncuesit e një krimi për të mbrojtur autorët e krimit./ Opinion.al
