Gjyqtari, Shyqyri Çobo, që kërkoi favore seksuale kishte lidhje farefisnore me 32 vjeçaren që ngacmonte. Këtë e bën të ditur vetë i ati i Irma T.
Familjarët e së resë së divorcuar nga i shoqi nuk e dinin historinë e mesazheve dhe telefonatave ngacmuese derisa vetë e bija ua ka treguar.
“Vajzën e shihnim të shqetësuar kur vinte në shtëpi pasi kishte mbaruar seanca gjyqësore. Disa herë e kisha pyetur, por ajo ngurronte të më shpjegonte pse rrinte e mërzitur. Duke e ditur se ne jemi kushërinj me gjyqtarin nuk na shkonte mendja se ai do të kryente këto veprime. Nuk na shkonte kurrë në mendje se ai do të ishte aq i lig sa të ngacmonte vajzën tonë,” thotë Ylmi T.
“Vajza ime ishte divorcuar nga i shoqi dhe nuk merrte pensionin ushqimor për fëmijët. Për këtë çështje u përplasëm në gjykatë”, vijon ai.
Vajza ka mbaruar studimet e larta për Gjuhë dhe Letërsi. Më herët nisi punë në shkollën e Urës Vajgurore dhe më pas u tranferua në një nga shkollat e qytetit. Sot është pa shtëpi, edhe pse jeton sëbashku me ne. Nuk nuk mund ta lamë vajzën rrugëve. Do të kujdesem për të sa të jem gjallë,” – tha babai i saj për “Gazeta Shqiptare”.
