Azdren Llullaku është futbollisti i momentit në kampionatin rumun, me golat e tij skuadra e Gaz Metan ka hedhur pretendimet për titullin kampion. Sulmuesi i kombëtares shqiptare ka realizuar 14 gola në 17 ndeshje duke kryesuar listën e golashënuesve. I fundit ishte të shtunën në fitoren 3-1 kundër Concordia Chiajna. I intervistuar nga “Telesport.al”, 28-vjeçari deklaroi se çelësi i suksesit është dëshira për t’u ngjitur sa më lartë. “Po kaloj një moment shumë të mirë me Gaz Metan, dhe kjo vjen falë përkushtimit dhe dëshirës për të arritur sa më larg. Në stërvitje jap maksimumin ashtu si edhe në lojë për të ndihmuar skuadrën në arritjen e objektivave. Jam i kënaqur me nisjen që i kam bërë këtij sezoni”. Aktualisht Gaz Metan pozicionohet në vendin e dytë me 30 pikë pas 17 ndeshjesh, 3 më pak se Steaua e Bucuresti-t që ka një ndeshje më pak. Duke parë ecurinë e javëve të fundit titulli duket i arritshëm. “Kemi mundësi të mira për t’u shpallur kampion, megjithatë kampionati është shumë i gjatë. Duhet të mendojmë vetëm për ndeshjen e radhës dhe shpresoj të vazhdojmë kështu deri në fund”.
Merkato është në prag dhe Llullaku e pranon se ka disa oferta si nga kampionati rumun ashtu edhe nga Italia. “Është e vërtët që kam disa oferta, por nuk dua të nxitohem. Kampionati italian më pëlqen, por nuk dua të jap emra pasi janë disa ekipe që kanë shprehur interes. Gjithsesi do të pres puzën e janarit dhe më pas do të vendos”. 28-vjeçari ka zhvilluar dy ndeshjen me kombëtaren por në asnjë takim nuk ka mbërritur tek goli, ndonëse po shkëlqen me klubin e tij. Në kualifikuesen ndaj Izraelit kuqezinjtë u mposhtën keqazi 0-3 në “Elbasan Arena”, por Llullaku e shikon si aksident këtë disfatë, teksa shtoi se për të ishte shumë e vështirë të shënonte pasi topin e kontrollonte kundërshtari.
“Me kombëtaren bëra dy ndeshje prej fillimit, të parën e fituam kundër Liechtenstein dhe ishte ndeshja ime e parë, dhe mendoj se kuptohet emocioni e dëshira e një lojtari që luan për herë të parë në kombëtare. Në ndeshjen e dytë kundër Izraelit pas 15 minutave të para gjithçka shkoi keq për ne. U akordua një penallti kundër nesh dhe Berat Gjimshiti doli me të kuq, kështu që mendoj se ishte vetëm një aksident i papritur. Gjithçka u ndërlikua për ne dhe ishte shumë e vështirë, sidomos për sulmuesit kur topin e kontrollon kundërshtari dhe ata ishin me dy lojtar më shumë”. Llullaku nuk pranon të flas për objektiva por thot se kuqezinjtë kanë shanse sërish dhe gjithçka mbetet e hapur, pasi janë për t’u zhvilluar edhe 6 ndeshje.
