Tirana është sot kryeqendra e Europës, pasi do të mirëpresë Samitin e Komunitetit Politik, forum i cili sjell në kryeqytetin shqiptar 52 liderë europianë, përfshirë këtu Presidentë, Kryeministra, liderë të BE-së, NATO-s dhe OSBE.
Samiti i organizuar bashkërisht nga Presidenti i Këshillit Evropian, António Costa dhe Kryeministri Edi Rama do të mbahet në Sheshin “Skëndërbej” dhe punimet do të nisin në orën 11:00, për të përfunduar me konferencën përmbyllëse në orën 18:30 të kryeministrit Edi Rama dhe kryeministres së Danimarkës, si vendi që do të presë samitin e radhës.
Tema e diskutimit të samitit do të jetë “Evropa e re në një botë të re: unitet – bashkëpunim – veprim i përbashkët” dhe është strukturuar në 3 tryeza të rrumbullakëta me tematika të ndryshme.
Më poshtë do të gjeni axhendën e Komunitetit Politik Evropian ditën e sotme:
10:00: Mbërritjet dhe deklaratat për shtyp
11:00: Ceremonia hapëse
11:30: Foto familjare
11:45: Sesioni i parë plenar
13:00: Dreka zyrtare
14:30: Mbledhja në tryeza tematike
15:45: Takime bilaterale midis krerëve të delegacioneve
17:30: Sesioni përmbyllës plenar
18:30: Konferencë e përbashkët me kryeministrin e Shqipërisë dhe kryeministrin e Danimarkës (ky i fundit do të jetë pritësi i radhës i këtij samiti)
Mbështetja për Ukrainën, mbrojtja evropiane, ruajtja e demokracisë, përgatitja dhe aftësia e reagimit ndaj kërcënimeve të ndryshme do të jenë në fokus të punimeve të samitit, pjesë e të cilit do të jetë edhe Kryeministri britanik, presidenti francez si dhe ai turk.
Dialogu mbi përmirësimin e konkurrueshmërisë së kontinentit përmes investimeve, inovacionit dhe ndërtimit të qëndrueshmërisë në disa fusha, sfidat e lëvizshmërisë, përfshi emigrimin e paligjshem, lëvizjen e punës dhe të rinjve do të jenë disa prej çështjeve që pritet të trajtohen.
