Prokuroria e Krimeve të Rënda do të rishqyrtojë marrëveshjen e të penduarit Julian Sinanaj.
ABC News ka mësuar se për momentin SInanaj do të vazhdoi gjykimin me cilësinë e të penduarit, por kjo marrveshje, thonë burimet, do të rishqyrtohet në kohën kur prokuroria do të jap pretencën për të gjithë të pandehurit e çështjes. Siç duket, Sinanaj rrezikon heqjen nga program i mbrojtjes, pasi ka mohuar tre ngjarje kriminale, të cilat pas arrestimit i ka pranuar.
Gjatë procesit gjyqësor që po zhvillohet me dyer të mbyllura, mësohet se Sinanaj ka mohuar tre ngjarje, dy me eksplozivë dhe një vrasjes në qytetin e Vlorës.
Para Gjykatës, ai ka mohuar autorësin, e vendosjes së eksplozivit në banesën e Ardian Kollozit, vrasjen e Agron Çelës dhe prodhimin dhe e shitjen e minës me celular të pandehurit Marjon Mitro, mine e cila u gjet posht makinës së ish-prefektit të Vlorës.
Nga ana tjetër, avokatët e të pandehurve të tjerë në këtë proces, kanë kundërshtuar dëshmin e Sinanajt të dhënë gjatë fazës së hetimit. Kjo kërkesë është përforcuar, sipas tyre, pas shfaqejes në sallën e gjyqit të video-regjistrimit të Sinanajt gjatë marrjes në pyetje. Video kjo që është shfaqur në sallën e gjyqit, e ku avokatët pretendojnë se gjatë marrjes në pyetje Sinanaj është detyruar të pi alkool nga drejtues të policisë.
Në pamje, thonë avokatët, duket qartë dhe dëgjohet zëri i ish-drejtorit të policisë së Tiranës Ardian Çipa që tashmë mban detyrën e zëvendësdrejtorit të Përgjithshëm të Policisë së Shtetit, i cili i bënë presion Sinanajt për të pranuar edhe ngjarje të tjeta që nuk i ka kryer. Me të njejtën gjuhë presioni dhe kërcënimi, thonë avokatët, në video dëgjohet edhe ish-zëvendësdrejtori i Përgjithshëm i Policisë së Shtetit Sokol Bizhga. Të cilët asistonin në dhomën ku Sinanaj merrej në pyetje nga oficerët e policisë gjyqësore. Për këtë fakt dhe tjera si këto, avokatët kanë kërkuar mos pranimin e kësaj prove, kërkesë që është rrëzuar nga Gjykata e Krimeve të Rënda, që tashmë ndodhet në fazën e shqyrtimit të provave të avokatëve mbrojtës. /abcnews/
