Rreth mesditës së të martës u liruan edhe pengjet e fundit ndërsa pengmarrësi u arrestua nga policia qipriote. Pengmarrja e avionit EgyptAir, alarmoi gjithë botën pasi u dyshua për një kamikaz terrorist që mund të hidhte në erë avionin me 81 pasagjerë.
Pas një situatë konfuze gjatë paradites, më vonë u mësua se pengmarrësi nuk ishte gjë tjetër vetëm një person i dëshpëruar që kërkonte të takonte ish-gruan e tij që jetonte në Qipro si dhe kërkonte azil politik në këtë shtet.
Avioni ishte nisur nga Aleksandria në 08:00 fluturonte drejt Kajros por nën kërcënimin e personit në fjalë bëri ulje të deytruar në aeroportin e Larnakës në Qipro rreth orës 08:40.
Autoritetet identifikuan rrëmbyesin si Seif El Din Mustafa (emri i dhënë më parë ishte i gabuar).
Ai në fillim ka liruar pengjet me kombësi egjiptiane dhe për 5 orë ka mbajtur peng në avion ekuipazhin dhe disa shtetas me nënshtetësi të huaj.
“Ai kërkoi që ish-gruaja e tij të shkonte në aeroport ta takonte”, thanë mediat vendase
Por ka edhe media të tjera që thonë se pengmarrja nuk ishte një “love story”, pasi pengmarrësi ka kërkuar lirimin e grave egjiptiane të burgosura.
Gjithsesi këto janë detaje që do të zbardhen, e rëndësishme është se 81 pasagjerët shpëtuan shëndosh e mirë.
