Selektori i Shqipërisë, Gianni de Biasi ka shkelur fjalët e tij.
“Nuk mund të marrë në Francë një lojtar që ka luajtur vetëm 13 minuta në eliminatore”. Ishte kjo përgjigjja e trajnerit Gianni De Biasi për Alban Mehën e lënë jashtë kombëtares. Megjithatë trajneri ka bërë një autogol në zgjedhjen e listës përfundimtare të Francës.
Frederik Veseli ishte emri më i lakuar i mbrëmjes së kaluar dhe mëngjesit të mërkurës në ambientet sportive dhe rrjetet sociale. 23-vjecari i lindur në Zvicër është bërë çështje në kombëtare.
Megjithëse nuk ka luajtur asnjë minutë në eliminatore apo edhe në ndeshje miqësore ai ka bindur trajnerin italian për të qenë pjesë e 23 më të mirëve vetëm në një ditë grumbullimi dhe në një lojë në pyll, raporton lajmi.net.
Mbrojtësi i Luganos ka qenë titullar në kampionatin vendas por në rolin e tij në kombëtare janë emra që zor se ai mund t’i rivalizojë si Hysaj apo Agolli. Të gjithë pyesin se si ai e bindi De Biasin për ta bërë pjesë e listës së shumëdëshiruar.
Një nga surprizat e listës “De Biasi” ishte padyshim mungesa e Berat Gjimshitit. Nëse diçka pritej për Amir Rrahmanin, Herolind Shalën dhe Milot Rashicën lënia jashtë europianit e mbrojtësit të Atalantës ka lënë shumë të habitur.
Jo vetëm që ka luajtur 363 minuta në kombëtare, por ka shënuar edhe një gol në ndeshjen kundër Armenisë që i dha kualifikimin Shqipërisë.
