Karin Witasek është një profesioniste austriake në fushën e promocionit (ka studiuar për shkenca ekonomike dhe marketing, konsulente komunikimi, specialiste PR), të cilën drejtuesit e FSHF-së e kishin punësuar pranë kombëtares që ditën e parë të grumbullimit në Austri dhe më pas në Francë.
Ajo kishte për detyrë menaxhimin e intervistave të pjesëtarëve të kuqezinjve për mediat e huaja, duke u kujdesur, sigurisht, të përcillte imazhin më të mirë të kombëtares në Europë.
Po ashtu, ajo kishte marrë përsipër që të hartonte në fund të Europianit një revistë speciale për kombëtaren shqiptare, duke u fokusuar tek emocionet e kualifikimit historik në “Euro 2016”, por kryesisht tek gjithçka ka ndodhur me përfaqësuesen tonë në Austri dhe Francë. Kuptohet, intervistat e dhëna nga lojtarët, stafi teknik, trajneri dhe presidenti Duka për mediat e huaja, të “kururara” prej saj, do të ishin pjesë e kësaj reviste speciale, e ilustruar me shumë foto.
Në fakt, ky bashkëpunim është ndërprerë ditët e fundit në mënyrë të njëanshme, sepse ajo është larguar nga kampi kuqezi. Mediat, ditën e sotme kanë shkruar se Karin Witasek është përzënë për shkak se ka “spiunuar” te zviceranët, se rrezikonte ta bënte këtë gjë edhe te francezët, duke ngritur një teori konspiracioni të paqenë. Burime të “telesport.al”, të pranishme pranë kombëtares kudo, në Austri dhe Francë, pohojnë se austriakja ka pasur përplasje me përfaqësuesin e shtypit të FSHF-së, lidhur mbi punën që kishte marrë përsipër të drejtonte, por edhe me të tjerë, pjesë e medias, që qëndrojnë gjithmonë në “hijen” e kuqezinjve, ngado e kurdo.
Ndërhyrja në punën e saj, pengesat e krijuara dhe mungesa e profesionalizmit të personave të caktuar shqiptarë kanë bërë që Karin Witasek të largohet, duke ia bërë të ditura të gjitha gjërat presidentit Duka, paraprakisht.
Ky i fundit nuk ka reaguar, duke anësuar në heshtje me “të vetët” e medias në kombëtare. Tashmë nuk dihet nëse revista speciale për kombëtaren në “Euro 2016”, e marrë përsipër të bëhej nga profesionistja austriake e fushës, do të realizohet apo jo. “Telesport.al” ka kontaktuar me Karin Witasek dhe pret prej saj, përmes rrëfimit personal, të zbulojë të vërtetën e ndërprerjes së bashkëpunimit me FSHF-në dhe të largimit të saj nga kampi kuqezi. Nga ana tjetër, vetë FSHF-ja nuk e ka parë të udhës të hedhë dritë mbi këtë rast, edhe pse është folur për spiunazh e teori të tjera konspirative në gjirin e kombëtares, para ndeshjes me Francën…
