Një 25-vjeçar iu dorëzua policisë austriake të dielën pasi pranoi se ka vrarë ish të dashurën e tij, familjen e saj dhe të dashurin e saj të ri në qytetin turistik Alpin të Kitzbuehel.
Agjensia e lajmeve austriake APA raportoi se i dyshuari 25-vjeçar, emri i të cilit nuk bëhet i ditur, pranoi të pesta vrasjet pasi u dorëzua në polici në qytetin e Innsbrukut, i njohur për mbajtjen garave të skive.
Gazeta Kurier në Austri tha se i dyshuari ishte ndarë me të dashurën e tij dy muaj më parë. Ai kishte hasur atë dhe të dashurin e saj të ri ndërsa kishte dalë të shtunën në mbrëmje dhe kishin patur një debat.
Sipas policisë, rreth orës 4 të mëngjesit të së dielës, ai u shfaq në shtëpinë e familjes së ish të dashurës së tij. Aty ai pati një debat me të dhe babain e saj. Pas këtij episodi i dyshuari shkoi në shtëpi, mori pistoletën e vëllait të tij dhe u kthye sërish në shtëpinë e ish të dashurës.
Policia pretendon se ai qëlloi fillimisht babanë teksa ai hapi derën, pastaj qëlloi vëllain e ish-të dashurës së tij në dhomën e gjumit. Pasi vrau nënën e saj, ai gjeti të mbyllur derën e apartamentit të ish të dashurës së tij, që ishte e lidhur me shtëpinë.
Ai doli jashtë dhe u ngjit mbi një ballkon në dhomën e ish të dashurës së tij dhe vrau 19-vjeçaren dhe të dashurin e saj 24-vjeçar, tha policia. /Opinion.al
