Policia italiane ka krijuar një identikit për ata që mund të jenë banditët e mundshëm të Audit të Verdhë që tërrorizoi Italinë e Veriut për afro dy javë.
Janë tre elementë ku policia italiane mbështetet në dyshimet e saj.
Sipas mediave italiane identikiti i personave është: “Të rinj, me flokë të errët dhe gjatësi mesatare”
Nga provat e mbledhura thuhet se tre banditët që dyshohen ende se janë shqiptarë janë të veshur me xhinse, atlete dhe xhupa me kapuç.
Kjo është fizionomia e ofruar nga filmimet e fundit të kamerave të sigurisë, marrë nga një pikë furnizimi me karburant në San Dona Di Piave (Venezia), ku ata janë kapur duke mbushur makinën për herë të fundit.
I pari që del është djali që ishte ulur në sediljen e pasme. Duket i tensionuar, aq sa nuk arrin të fusë paratë në automat për të bërë blerjen e karburantit.
Nga makina del djali tjetër, për të ndihmuar shokun, duket më i qetë, dinak dhe mban gjithë kohës dorën përpara për të fshehur fytyrën.
Në momentin që afrohen makina të tjera, të dy hipin në makina dhe i treti e nis me shpejtësi të madhe.
Mbi këtë filmim janë duke punuar ekspertët për të marrë çdo element të nevojshëm për identikitin dhe mbi të gjithë për të arritur një cilësi të mirë të imazheve që do tregojnë fytyrat e keqbërësve.
Hetuesit nuk janë limituar vetëm me imazhet e telekamerave, kanë sekuestruar edhe 640 eurot, që gjendeshin aty, për të marrë cdo shenjë të mundshme që mund t’i cojë tek tre të kërkuarit.
Bashkë me paratë janë sekuestruar edhe faturat, edhe paratë e paguara në San Zenone, zona tjetër ku ata u kapën po nga kamerat e sigurisë.
Një nga shenjat që për policinë mund të jetë me shumë vlerë është ajo e gjetur jashtë makinës, në një distancë prej saj, është pikërisht një mbetje cigareje.
Po merren edhe gjurmë të saj, me dyshimin se është konsumuar nga njëri prej banditëve që mund të ketë parë djegien e “Audit” duke tymosur një cigare.
