Fushëkrujasi Durim Bami shkon në gjykatë për pastrim parash. Prokuroria e Krujës ka përfunduar hetimin dhe e akuzon Bamin për veprën penale të “Pastrimit te parave”.
Nga hetimi, ka rezultuar se Bami ka lidhur kontrata për shitblerjen dhe qiradhënien e pasurive, në zyra të ndryshme noteriale, në harkun kohor 2011-2015, duke kryer transaksione në vlerën totale 15 milione 670 mije lekë.
Në përfundim të hetimeve, Prokuroria e Krujës ka arritur në konkluzionin se ky shtetas, pa pasur asnjë të ardhur të ligjshme financiare, nëpërmjet këmbimit ose transferimit të pasurisë, per te fshehur origjinën e saj te paligjshme, ka konsumuar elementët e veprës penale të “Pastrimit te produkteve të veprës penale..
Durim Bami u bë i njohur nga Tom Doshi rreth një vit më parë. Deputeti e nxori me zë dhe me figurë këtë personazh, ku thoshte se ishte paguar për të ekzekutuar Doshin. Në atë kohë deputeti i Shkodrës fajësonte Ilir Metën.
Durim Bami u quajt për disa kohë “vrasësi i prezumuar” dhe lajmet në media për të ishin të përditshme. “Atentati” ndaj Doshit dhe “atentatori” Bami, për herë të parë në histori çuan në dyert e prokurorisë politikanët dhe shtetarët e vendit, si Sali Berisha, Edi Rama, Ilir Meta, Saimir Tahiri, etj. Çështja “Doshi” është mbyllur pasi nuk u gjetën prova për “atentatin”. Bami u lirua para disa muajsh por me sa duket do përfundojë sërish pas hekurave.
