(Viktima Erven Hyseni)
Një atentat me armë zjarri është kryer pasditen e kësaj të mërkure në Sheshin e Flamurit, në Vlorë, ku dy persona kanë mbetur të vrarë.
Pasi mbeti i vrarë me armë zjarri drejtori i OSHEE në Vlorë Roland Saliu, pak minuta më vonë u konfirmua se viktimë nga kjo ngjarje ka mbetur edhe biznesmeni Erven Hyseni, pronar i televizionit ‘Vlora Channel’ në qytetin e Vorës, i cili ishte edhe shënjestra e atentatorëve.
Atentati është kryer në hotelin e tij, kur ai ishte duke pirë kafe. Sipas burimeve Hyseni është 38 vjeç, i martuar dhe baba i një fëmijë 5 vjeç. Ai është një biznesmen i respektuar dhe njihet në qytet si njeri i dashur dhe bujar.
Autorët nuk janë identifikuar ende, pasi ata kanë hyrë me maska në hotelin e tij dhe e kanë qëlluar. Nuk dihen as motivet se pse është qëlluar, pasi viktima nuk ishte njeri problematik. Hoteli i tij është i vetmi në sheshin e Flamurit, ndërsa televizioni i tij, është një ndër më të ndjekurit në Vlorë.
Ai ka mbetur i plagosur, por më pas ka ndërruar jetë disa minuta më vonë.
Burimet theksuan se Saliu dhe Hyseni ndodheshin të ulur në lokalin e hotelit, kur papritur janë përshkuar nga breshëria e plumbave, rreth orës 19:40.
Nga gëzhojat e mbledhura në vendin e ngjarjes hetuesit kanë arritur në përfundimin se autorët kanë hapur zjarr me një armë automatike.
Ndërkohë, përveç agjentëve që po ekzaminojnë vendin e krimit për të mbledhur prova, të tjerë kanë ngritur postoblloqe në zona të ndryshme të qytetit bregdetar.
Nga kontrollet e kryera është gjetur një mjet i braktisur në rrugën e vjetër të Panajasë, që dyshohet të jetë përdorur nga autorët.
