Një provë tjetër është siguruar nga Prokuroria e Krimeve të Rënda në lidhje me atentatin në mbikalimin e Shkozetit.
Sipas burimeve nga grupi hetimor mësohet se analiza balistike ka provuar se plumbat e gjetura në vendin e ngjarjes janë qëlluar nga armët e gjetura në automjetin e braktisur në Shkafanë të Ishmit.
Është zbuluar gjithashtu një predhë e padëmtuar në automjetin e prokurorit e cila është shkrepur nga njëra nga armët kallashnikov.
Mësohet se makina e atentatorëve është filmuar nga kamerat e sigurisë të një servisi pranë vendngjarjes.
Prokurorët kanë sekuestruar telefonat e Arjan Ndojit, Aleksandër Lahos alias Pëllumb Muahrremi, Andi Malokut dhe Redjan Rrajës. Ky i fundit është i arrestuar i vetëm në lidhje me këtë ngjarje por është identifikuar gjithashtu edhe një person tjetër i implikuar në ngjarje.
Pak orë më parë në Spitalin e Traumës në Tiranë ndërroi jetë shoferi i prokurorit Ndoja, Andi Maloku i cili kishte marrë dy plumba në mushkëri ku njëri kishte prekur shtyllën kurrizore.
Grupi hetimor është përqendruar në pistat e konfliktit për shkak të çështjes së pronave në të cilat mendohet të jetë përfshirë Pëllumb Muharremi i njohur me nofkën “Rrumi” por mund të jenë administruar nga prokurori Arjan Ndoja. Në bagazhin e makinës së tij janë gjetur ndërkohë një numër dokumentesh ku dyshohet se janë një pjesë e fashikujve të dosjeve të vjedhura nga prokuroria e Durrësit. Vetë prokurori Ndoja e ka mohuar një gjë të tillë duke pohuar se janë fotokopje dokumentesh të cilat ai i ka përdorur për konsulencë ligjore. Por ky aktivitet është i paligjshëm për një prokuror dhe për këtë fakt Prokuroria e Përgjithshme ka nisur një verifikim ndaj prokurorit. /Opinion.al
