Atentati mafioz i kryer pasditen e sotme në qytetin e Lushnjes ku prodhoi një bilanc tragjik me dy të vdekur dhe dy të plagosur, kishte nën shënjestër Xhulio Shkurtin, nipin e Aldo Bares.
Burime jo zyrtare të Opinion.al, thanë se Xhulio Shkurti ishte i pranishëm në momentin kur një makinë u afrua dhe qëlloi mbi të rinjtë, por fatmirësisht shënjestra ka arritur t’u shpëtojë plumbave të atentatorëve.
Dy viktimat e kësaj masakre, Jurgen Hoxha dhe Zamir Latifi kanë lidhje me Xhulio Shkurtin.
Jurgen Hoxha është kushëri me Xhulio Shkurtin, ndërsa Zamir Latifi është shok i tij.
Policia e Shtetit përmes një deklarate për mediat, ka dhënë një informacion paraprak, ndërsa thekson se në lagjen “Loni Dhamo”, në vendin e quajtur “Ura e Përroit” në Lushnje, nga persona të paidentifikuar ende është qëlluar me armë zjarri automatik dhe për pasojë kanë humbur jetën dy shtetas, si dhe kanë mbetur të plagosur dy persona, njëri ndodhet në gjendje të rëndë, kurse tjetri ka marrë dëmtim të lehtë pa probleme për jetën.
Policia ka sqaruar se viktimat janë janë shtetasit Z. L, 23 vjeç dhe J. H., 22 vjeç, banues në lagjen “Loni Dhamo”, Lushnje.
Shtetasi i plagosur rëndë është M.Xh, 26 vjeç, banues në lagjen “Loni Dhamo”, i cili po transportohet për në Tiranë.
Si dhe ka marrë demtim të lehtë shtetasi B.T, 66 vjeç.
Një vit më parë, Xhulio Shkurti, nipi i Aldo Bares, është plagosur bashkë me shokun e tij Sajmo Xhelili në qendër të qytetit të Lushnjes.
Antentati ndaj tij ndodhi pranë lagjes Çlirimi, vetëm 100 metra larg komisariatit të policisë.
Dy të rinjtë u plagosen me pistoletë, njëri në këmbë, ndërsa tjetri në bark.
Policia nuk arriti të zbardhë dot arsyet e atentatit që ndodhi një vit më parë, në fund të muajt shtator.
