Një atentat me një të vrarë dhe dy të plagosur tronditi vendin pas mesnatës të së hënës në fshatin Larushk të Krujës.
Viktimë e atentatit mbeti shtetasi Ramazan Sino, 29 vjeç, ndërsa u plagosën 2 fëmijët e mitur 10 dhe 13 vjeç të shtetasit Gentjan Bejtja, i cili dyshohet të ketë qenë shënjestra e atentatit. Sipas raportimeve në media, mësohet se viktima ka punuar si shofer në Prokurorinë e Apelit.
Ndërkaq, raportohet se autorët kanë lënë automjetin e tyre pak metra larg banesës së Gentjan Bejtes dhe kanë zbritur në këmbë dhe më pas kanë qëlluar. Kur kanë hapur zjarr, 29-vjeçari Sino ka qenë duke zbritur nga makina së bashku me fëmijët e Bejtjes.
Sipas dëshmitarëve të ngjarjes, autorët kanë qëlluar dy herë. Njëherë tek banesa dhe 4 herë të tjera në rrugën kryesore aty ku u gjetën dhe 4 gëzhoja.
Grupi hetimor që ka mbledhur provat dhe po punon për zbardhjen e atentatit ka sekuestruar rreth 28 gëzhoja në vendngjarje.
Ndërkohë theksohet se një natë më parë, Bejtja ka qenë në shtëpi. Ndërsa autorët kanë pasur dijeni për lëvizjet e tij.
Gjithashtu ka dyshime të forta, se Bejtja mund të ketë qenë në automjet gjatë atentatit, por sipas News 24, ai dyshohet se ka zbritur nga makina përpara se të qëllojnë autorët./Opinion.al
