Policia ka dhënë detaje lidhur me makinën e djegur të gjetur në territorin e fshatit Likmetaj, që dyshohet se iu përket autorëve të atentatit të ndodhur mbrëmjen e djeshme në lokalin në “Don Bosko”.
Uniformat blu bëjnë me dije se kanë konstatuar automjetin tip “BMW” të djegur plotësisht, ndërsa brenda tij janë gjetur 3 armë zjarri automatike me të cilat dyshohet se është kryer sulmi.
“Rreth orës 08:00, në vendin e quajtur “Ura e Sulë Meres”, në territorin e fshatit Likmetaj, shërbimet e Policisë të Stacionit të Policisë Manzë, duke ushtruar kontroll në territor, për kapjen e autorëve të ngjarjes së ndodhur mbrëmjen e djeshme, në rrugën “Ananstas Shundi”, Don Bosko, Tiranë, kanë konstatuar të djegur plotësisht, një automjet tip “BMË”, brenda të cilit janë gjetur 3 armë zjarri automatike.
Nga hetimet paraprake dyshohet se ky automjet është përdorur për kryerjen e ngjarjes së mbrëmshme, në rrugën “Ananstas Shundi”, Don Bosko, Tiranë.
Grupi i posaçëm hetimor i ngritur në Drejtorinë Vendore të Policisë Tiranë, me qëllim zbardhjen e kësaj ngjarjeje, identifikimin dhe kapjen e autorëve, vijon punën në bashkëpunim me specialistët e Institutit të Policisë Shkencore, për të dokumentuar lidhjen e automjetit të djegur, me ngjarjen e ndodhur mbrëmjen e djeshme, në Tiranë”-njofton policia.
Viktimë e ngjarjes mbeti banakierja Mimoza Paja e cila është vrarë aksidentalisht dhe u plagosën Shehat Murati 50 vjeç, (xhaxhai i Fatjon Muratit, pronar i lokalit ku ndodhi sulmi), Astrit Meraj 42 vjeç, Emanuel Sala 47 vjeç, Ermir Bejuku 45 vjeç dhe Genc Shohalli 55 vjeç./Opinion.al
