Zbardhet dëshmia e një personi që ka parë nga afër ngjarjen e së premtes mbrëma në rrugën “Irfan Tomini”, ku 37 vjeçari Viljon Cakollari u qëllua me katër plumba, teksa hynte në pallatin ku banon.
Grupi i hetimit i ngritur për ngjarjen, dje gjatë gjithë ditës ka kaluar në sitë bizneset private të zonës që mund të kenë pasur kamera sigurie me kënd shikimi drejt vendit të ngjarjes. Asnjë e tillë nuk është gjetur në fund të ditës së djeshme, duke e bërë më të vështirë identifikimin e autorit.
Ndërkaq, dëshmitarët i kanë thënë policisë se një person i vetëm i veshur me rroba sportive të errëta ka qenë ai që ka shtënë me armë ndaj 37vjeçarit.
Autori besohet se ka shkrehur një karikator pistolete, pasi tre plumba kanë prekur edhe portën hyrëse të pallatit, ndërsa katër predha kanë dëmtuar trupin e Vilion Cakollarit.
Sipas dëshmitarëve, personi në fjalë ka qenë i maskuar me një kapele në kokë, strehën e së cilës e kishte ulur fort mbi fytyrë.
Pasi ka qëlluar ndaj punonjësit të Ministrisë së Brendshme, autori i krimit ka ikur në këmbë duke u zhdukur mes pallateve.
Dyshohet se mund të kemi të bëjmë edhe me një atentat nga vrasës me pagesë. Megjithatë është shumë e vështirë për momentin identifikimi i tij pasi në zonën ku ka ndodhur ngjarja janë të pakta kamerat e sigurisë. Ndoshta kjo ka qenë edhe një zgjedhje e autorit, për të shmangur gjurmët më pas, të kryejë atentatin në një zonë që pakkush mund ta identifikojë.
Në foton e publikuar në këtë shkrim, shihet zona ku ka ndodhur ngjarja.
