Kryetari i Partisë Demokratike, Lulzim Basha ka reaguar pas atentatit të bërë në “Mbikalimin e Shkozetit” ndaj prokurorit Arjan Ndoj. Së bashku me prokurorin mbetën të plagosur dhe dy persona të tjerë, Aleksandër Laho, i njohur si Landi Muharremi dhe Andi Maloku.
Ndërkohë, kreu i PD përmes një postimi në rrjetet sociale shprehet se atentati ndaj një prokurori është ngjarja më e rëndë që mund të ndodh në një vend. Sipas tij, sot krimi ka treguar se nuk ka frikë nga shtetit. Basha shprehet se ngjarja rëndohet edhe më tepër, pasi ajo u parapri nga kërcënimet e kryeministrit, Edi Rama dhe zëvendëskryeministrit, Erion Braçe.
Kreu i selisë blu, thekson se ngjarja duhet të zbardhet sa më parë dhe se autorët duhet të shkojnë para drejtësisë, kështu shteti, sipas tij, do të dëshmojë se nuk është mposhtur totalisht nga krimi. Kryedemokrati deklaron se krah krimit në janë përfshirë persona që bëjnë pjesë në segmentet më të larta të pushtetit.
Reagimi i Bashës
Atentati ndaj një prokurori është ngjarja më e rëndë mafioze që mund të ndodhë në një vend. Ngjarja e sotme tregon se krimi nuk e ka frikë shtetin. Më e rëndë është situata kur kjo ngjarje kriminale u parapri nga kërcënime direkte të kryeministrit dhe zëvendëskryeministrit ndaj këtij prokurori, i cili nëse dyshohej se ka shkelur ligjin duhet të çohej para drejtësisë e jo të linçohej publikisht.
Zbardhja sa më parë e kësaj ngjarje të rëndë dhe vënia para drejtësisë e autorëve dhe porositësve të këtij krimi mafioz është jetike për të dëshmuar se shteti nuk ka kapitulluar totalisht para krimit.
Sonte dua të inkurajoj çdo prokuror dhe punonjës të ndershëm të policisë të luftojnë krimin dhe të mos gjunjëzohen para tij. E di se flas në emër të shumicës dërrmuese të shqiptarëve, kur ju them se keni në këtë betejë simpatinë dhe mbështetjen mbarëpopullore, edhe kur kundër jush e në krah të krimit janë të implikuar segmentet më të larta të pushtetit./ Opinion.al
