Syri Mehmedaj po drejtonte një Benz me targë AA 031 NL kur u qëllua me armë tek rrethrrotullimi i lagjes “Xhabiej” në hyrje të qytetit të Shkodrës. Dy persona me skafandra në kokë i janë afruar me një motor dhe e kanë qëlluar me dy plumba.
Ai ka shkuar vetë në spital me plumba në trup, ndërsa mësohet se bashkë me të në makinë ka qenë edhe bashkëshortja. Kjo e fundit arriti t’i shpëtonte mrekullisht armës së atentatorëve.
Kanë qenë të paktë ata që kanë kuptuar atë çfarë po ndodhte, pasi arma ka qenë me silenciator dhe askush nuk ka dëgjuar të shtëna, thanë burime nga policia.
Policia, edhe pse ka marrë në pyetje bashkëshorten e Mehmedajt, e cila ka qenë së bashku me të shoqin në makinë. Sipas saj, gjithçka kishte ndodhur në një kohë të shpejtë dhe ajo nuk kishte arritur të identifikonte ndonjë shenjë dalluese të autorëve.
Gjithashtu ajo ka mohuar që i shoqi të ketë pasur konflikte me persona të tjerë. Policia do të marrë në pyetje të dëmtuarin, dëshmia e të cilit mund t’i orientojë hetimorët drejt identifikimit të autorëve.
Paraprakisht policia bëri të ditur se i plagosuri ka disa precedentë në fushën e vjedhjes dhe kishte rreth 3 muaj që ishte liruar nga burgu. Ai njihet si person problematik në Shkodër, ku kishte patur konflikte edhe më parë.
