Ilir Deromemaj 45 vjeç ishte objekt i një atentati mbrëmë në Vlorë, ndërsa Dhimitër Cani 60 vjeç dyshohet se është vrarë aksidentalisht. I plagosur ka mbetur edhe Krenar Runaj 50 vjeç. Ngjarja ka ndodhur rreth orës 22:00 të së dielës, në rrugën e spitalit, në një pikë bastesh në pronësi të Ilir Deromemajt. Burimet thonë se ishte pikërisht ky i fundit objektiv i atentatorëve.
Ai u ekzekutua me një breshëri kallashnikovi nga një person i paidentifikuar nga një makinë që ishte në lëvizje dhe që më pas u largua me shpejtësi.
Ilir Deromemaj është person me precedentë penalë, pasi në vitin 1998 ka vrarë shtetasin Lame Gockaj. Plumbat kanë zënë edhe 60-vjeçarin Dhimitër Cani, që humbi jetën menjëherë dhe Krenar Runajn 50-vjeç, që mbeti i plagosur.
Rreth 3 orë pas vrasjeve policia e qytetit bregdetar ka gjetur një makinë të djegur pranë varrezave në fshatin Alikok, e cila dyshohet se është përdorur nga autorët e atentatit.
Makina është tip “Jeep” me targa AA 210 FS, ndërsa rezulton i vjedhur në Fier para 2 muajsh.
