Të shtëna me armë zjarri janë regjistruar mbrëmjen e së martës në lagjen “Çole” të qytetit të Vlorës.
Lidhur me ngjarjen ka reaguar policia, e cila ka dhënë informacion zyrtar. Sipas policisë, nga të shtënat me armë kanë mbetur të plagosur dy persona, 30-vjeçari Kevin Hajrulla, dhe një 35 vjeçar i identifikuar me inicialet A. S.
Objektiv i atentatit ka qenë Kevin Hajrulla, i cili në momentin e ngjarjes ka qenë duke lëvizur me automjet, ndërsa 35-vjeçari ka qëlluar rastësisht në vendin e ngjarjes dhe është kapur nga plumbat.
Të dy janë transportuar për në spital dhe po marrin ndihmë mjekësore. Ndërkohë, në afërsi të fshatit Panaja, është gjetur duke u djegur automjeti i dyshuar se është përdorur nga autorët.
Njoftimi i policisë:
Vlorë/ Informacion paraprak
Mbrëmjen e sotme, rreth orës 21:30, në lagjen “24 Maji”, Vlorë, në rrethana ende të paqarta, është plagosur me armë zjarri shtetasi K. H., rreth 30 vjeç, i cili udhëtonte me një automjet tip “Benz”. Si pasojë e të shtënave, është plagosur me armë zjarri edhe shtetasi A. S., 35 vjeç, i cili ndodhej në afërsi në momentin e ngjarjes.
Të dy personat janë transportuar menjëherë në Spitalin Rajonal Vlorë dhe ndodhen nën kujdesin e mjekëve.
Gjatë krehjes së zonës në afërsi të fshatit Panaja, është bërë i mundur lokalizimi i automjetit të dyshuar të përdorur nga autorët, i cili është përfshirë nga flakët. Po punohet për shuarjen e zjarrit.
Shërbimet e Policisë kanë mbërritur menjëherë në vendngjarje dhe po punojnë intensivisht për identifikimin dhe kapjen e autorit/autorëve të dyshuar.
Grupi hetimor po vijon punën për zbardhjen e rrethanave të plota të ngjarjes.
