Disa ditë pas atentatit që iu bë në Wuppertal, të Gjermanisë, një 36-vjeçar shqiptar nuk ka mundur të mbijetojë.
Sipas mediave vendase ai ka ndërruar jetë në spital. Ngjarja ka ndodhur në 28 prill. Ka qenë ora rreth 21:00 kur qytetarët njoftuan policinë për të shtëna me armë zjarri.
Sapo autoritetet shkuan në vendngjarje, në rrugë gjetën të shtrirë shqiptarin, i cili kishte plagë arme. Pak më tutje ishte automjeti i tij i ndaluar në mes të rrugës.
Nga hetimet e deritanishme të policisë gjermane është mësuar se shqiptari ka qenë brenda makinës së tij kur u qëllua me armë. Edhe pse mbeti i plagosur, ishte në gjendje të dilte nga mjeti tip BMW, dhe më pas u gjet i shtrirë në rrugë. Pranë tij u gjet edhe një armë, për të cilën nuk ka të dhëna se kujt i përket.
Sa për autorët, ende nuk ka asnjë pistë nëse ka qenë një person i vetëm apo disa që sulmuan 36-vjeçarin shqiptar, identiteti i të cilit nuk bëhet i ditur./ Opinion.al
