Në 11 Prill 2024 në Darzezë të Fierit u bë një protestë nga banorët e zonës, të cilët pretendojnë, se subjektet që punojnë aty, të gjitha derdhjet i shkarkojnë në kanalet vaditëse duke dëmtuar bimësinë dhe bagëtinë e zonës.
“Ndotja e kanaleve sa vjen gjithmonë po bëhet edhe më shqetësuese nga derdhjet e bizneseve që funksionojnë në këtë zë dhe i derdhin në kanalet e ujërave tona. Pastrimet që bëjnë ata me kimikate, me çfarëdo kanë ndikuar që ujërat të bëhen acid, të papranueshme për bimët dhe për bagëtitë. Këtu jemi tek hidrovori Darzezë e re i cili mbledh ujërat që nga Frakulla, Semani dhe bën ngritjen mekanike që e ngre në det. Ky problem është i lidhur edhe me faktorin turizëm, por njëkohësisht ndotja ekologjike ka ndikuar në pakësimin e peshkut që kishte”, tha një denoncues.
“Bagëtitë nuk e pinë ujin e kanalit. Uji është bërë shumë acid. Është shkatërrues për tokën. Kemi bërë shpime vetë që të vadisim vetë. Njerëzit po tërhiqen nga toka, ky është problemi, po e lënë se është pa eficencë”, tha denoncuesi.
Fajtor për këtë situatë, banorët bëjnë subjektin Allidagu që rrit dhe përpunon mish gici.
“Kompleksi i derrave është një nga faktorët kryesorë që bëjnë derdhje. Kjo është pika që bën riciklimin hidrovori se tokat këtu janë nën nivelin e detit, merr ujë dhe e hedh në det. Kur ne presim të vijnë turistët që të shesim perime dhe të punësohemi na prish imazhin. Kjo nuk është e ardhmja që e pret turizmin tonë. Ka papastërti të shumta që jep alergji të shumta sepse mund të lahen edhe në kanale fëmijët, buzë detit”, tha denoncuesi.
Me kamerën e “Stop” bëjmë një vëzhgim nga pika me fundore e këtyre mbetjeve, pra nga hidrovori i Darzezës deri tek fabrika e derrave ku gjatë rrugës shohim ndotjen e ujit.
Gazetarja iu drejtua stabilimentit të derrave, ku menaxheri i saj Besnik Alliaj tha se është në rregull me leje mjedisore të tipit A.
“Janë të pavërteta. Këtu jemi në fshatin Shtyllas dhe në Pojan. Nuk është e vërtetë ajo që thonë. Derdhjet venë në vaskat e plehut që kemi ne dhe e marrim dhe shkrypëzojmë tokat. Kemi mbi 20 hektarë tokë që e mbjellim me misër, hektarë dhe elb. E tëra shkarkohet në tokat tona. Kjo është pompa e bonifikimit. Gjithë kompleksi është me vaska poshtë. E marrim ujin, e riciklojmë, plus që e çojmë e çojmë nëpër parcelat tona.
Ishte stërr i zi kanali. Te kanali shkarkohen Shtyllasi, Novosela, shkarkohen të gjitha këtu. Ai vë lavatriçen, bën dhe shurrën atje, normal bëhet stërr i zi. Ku do venë ato. Ai shkarkon lavatriçen dhe thotë e bëjnë derrat”, tha Alliaj.
“Këtu jemi leje mjedisi të kategorisë A e përpiktë me kontrolle. Vaskat janë jashtë kompleksit me tokë të zezë, siç është mbrapa. Nuk shkarkon detin e Darëzezës. Këto shkarkohen në vaska me beton. Janë vaska betoni, aty shkarkohen ujërat, pastaj uji në det do të vejë, nuk do të vejë pas diellit”, shtoi ai.
Ai thotë se ka ardhur Inspektorati i Mjedisit që i kanë thënë:
“Pak neglizhencë e jona, por çdo gjë në rregull me ujërat”, tha Alliaj.
Për këtë rast gazetarja komunikoi me drejtorin e ARM-së Fier, Denis Vogli, i cili tha se do të merren masa për problemin e banorëve.
Drejtori Denis Vogli: Po, jam në dijeni, se është bërë një protestë të enjten. Edhe kam njoftuar Agjencinë Kombëtare të Mjedisit. Të premten kemi shkuar, kemi marrë mostra, përgjatë gjithë pjesës së kanaleve atje. Janë nisur mostrat në Tiranë, për të konstatuar, se cila është pjesë e ndotjes së ujërave. Kemi bërë edhe disa verifikime tek subjekti “Allidagu”, jo vetëm tek ai, po përgjatë gjithë vijës, ku kemi bërë një shkresë “Bordit të Kullimit”, “Inspektoratit Kombëtar të Mbrojtjes së Territorit”, pasi është inspektorati, që inspekton subjektet e pajisura me leje mjedisi, dhe përgjatë asaj vije në vetëm këtë subjekt “Allidagu” kemi të pajisur me leje.
Gazetarja: Janë zbatuar këto kritere të lejes?
Drejtori Denis Vogli: Jemi në pritje të përgjigjes së analizave tani për vazhdimin e procedurave të inspektimit tek ky subjekt.
U morën mostrat e ujit që u çuan në Tiranë dhe pas disa ditësh ARM gjobiti me 3 milionë lekë subjektin e derrave, Allidagu, duke i lënë edhe detyrë, që të rregullojë mënyrën e derdhjeve, pasi në të kundërt do i mbyllet aktiviteti.
Drejtori Denis Vogli: Ë sot kemi një përgjigje në lidhje me analizat e kryera për kanalin në hidrovor të Darzezës, ku në analizën e kryer, vlerësohet ndotja organike në stacionin e kampionuar për këtë arsye kemi kryer një inspektim tek subjekti “Allidagu”.
Gazetarja: Dhe si rezultoi?
Drejtori Denis Vogli: U konstatua mostrajtimi i mbetjeve të lëngëta i cili ky subjekt i depozitonte në pronën e tij, por duke qenë se nuk kemi vaskat e mirëfillta të dekantimit të këtyre mbetjeve, në kundërshtim me lejen mjedisore, është parashikuar masë administrative, masë dënim me gjobë në vlerën 300 mijë lekësh të reja, dhe si dënim plotësues është lënë, që subjekti, duhet të ndërpresë në mënyrë të menjëhershme shkarkimet e ujërave të ndotura në pjesën e kanalit vaditës, si dhe të rehabilitojë atë pjesë të kanalit. Bëhet fjalë për një pjesë kanali, që është nga subjekti deri në afërsi të hidrovorit! Të riparojë sistemin e tubave për tërheqjen e ujërave të ndotur, dhe të ndërtojë brenda 10 ditësh vaskat e magazinimit dhe trajtimit dhe asgjësimit të ujërave të ndotura, që dalin nga proceset e ndryshme të instalimit! Është detyruar, që ta ndërpresë në mënyrë të menjëhershme shkarkimin e ujërave të ndotura në kanalin vaditës.
