Kryetari i partisë Bindja Demokratike, Astrit Patozi thotë se do të ankikojë zgjedhjet e 30 qershorit. Vetë Patozi në një status në facebook, pasi sqaron arsyet sipas tij pse morri pjesë, thotë se do t’i ankimojnë këto zgjedhje pasi PS ka tjetërsuar votën.
“Refuzimi i pranisë sonë nëpër komisionet e votimit dhe në tavolinat e numurimit është një argument i mjaftueshëm që ne të kemi dyshime të arsyeshme se rezultati i këtyre zgjedhjeve është trukuar nga profesionistët e vjedhjes së votës në Shqipëri. Ky ankimim mbështetet edhe nga të dhëna të besueshme që na sjellin përfaqësuesit dhe vëzhguesit tanë nga disa bashki të vendit, ku shkeljet kanë qenë më flagrante. Ne kemi dyshime se në shumë qendra votimi janë hedhur fletë votimi për të rritur fiktivisht numrin e mbështetësve të qeverisë, në shumë zona ka pasur haptazi votim familjar, ndërsa në tavolinat e numërimit janë ndryshuar rezultatet e zgjedhjeve në favor të Partisë Socialiste ose aleatëve të saj”, shkruan Patozi.
Më herët ishte kandidati i Bindjes Demokratike për Kurbinin, Edmond Piroli që paralajmëroi se do t’i drejtohet Kolegjit Zgjedhor për rezultatin e 30 qershorit.
Prokuroria ndërkohë ka procedimi penal për disa kallëzime që pretendojnë për krime zgjedhore më 30 qershor, të cilat përfshijnë nga dyshimet për falsifikim të materialeve zgjedhore deri te akuzat për pengim të zgjedhësve./ Opinion.al
