Milionat nuk bëjnë punë. As yjet e marra nga klubet e tjera. Duhet traditë, para së gjithash, për të fituar Ligën e Kampioneve. Këtë të vërtetë e ka mësuar për të disatën herë PSGja, e cila e ka “Ligue 1” si “stërvitore”, sepse e fiton kampionatin francez që në gjysmën e kampionatit. Mirëpo, kur përballet me rivalë në Champions, nuk shkon dot më larg se çerekfinalet. Mbrëmë parizienët janë “gjunjëzuar” para Manchetser City. I ashtuquajturi derbi i “sheikëve” është fituar nga të besuarit e Pellegrinit, të cilët e shohin veten në gjysmëfinale.
Ibrahimoviç dhe të tijtë do ta përcjellin nga ekrani pjesën e mbetur të kompeticionit më të rëndësishëm për klubet europiane. Veç të tjerash, duket se Champions-i është diçka e mallkuar për gjigantin suedez. Ka shumë trofe në “palmaresin” e tij, por më i rëndësishmi, Liga e Kampioneve, i mungon. Kjo e “tkurr” disi staturën e këtij ylli të futbollit botëror. Rrjetet sociale kanë shpërthyer në montazhe të ndryshme, duke ironizuar me Ibrën, që nuk ia doli edhe kësaj here të ngrejë me duar “kupën veshëgjatë”. Ndoshta nuk do ta ngrejë asnjëherë… Ky është mallkimi më i madh për të si futbollist!
