Asambleja plenare e COP27 në Sharm el-Sheikh miratoi dokumentin përfundimtar të konferencës.
Punimi ruan qëllimin për të mbajtur ngrohjen globale brenda 1.5 gradëve të niveleve para-industriale, arritja kryesore e COP26 në Glasgow vitin e kaluar. Bashkimi Evropian ka shprehur ‘zhgënjim’ për ‘mungesën e ambicies’ në marrëveshjen përfundimtare të konferencës për klimën COP27 mbi udhërrëfyesin për të reduktuar emetimet e CO2.
“Ajo që kemi përpara nuk është e mjaftueshme për të bërë një hap përpara për popullsinë e planetit. Nuk sjell përpjekje shtesë të mjaftueshme nga ndotësit kryesorë për të reduktuar emetimet e tyre”, tha nënkryetari i Komisionit Evropian Frans Timmermans, duke mbyllur konferencën e OKB-së për klimën në Sharm El Sheikh.
Theksohet rëndësia e kalimit drejt burimeve të rinovueshme dhe shpresohet eliminimi i subvencioneve për lëndët djegëse fosile. Por dokumenti kërkon vetëm reduktimin e prodhimit të energjisë elektrike me qymyr me emetim të pandërprerë, jo eliminimin e tij. Më e rëndësishmja, nuk thotë asgjë për reduktimin ose eliminimin e përdorimit të lëndëve djegëse fosile, siç kishin kërkuar disa vende.
Guterres, nuk trajtoi uljen e emetimeve
“Ne duhet të reduktojmë në mënyrë drastike emetimet tani, dhe kjo është një çështje që ky COP nuk e ka trajtuar. Botës ende i duhet një kërcim gjigant në ambicien klimatike. Vija e kuqe që nuk duhet të kalojmë është vija që e çon planetin tonë përtej kufirit 1.5 gradë të temperaturës”. Kështu ka thënë sekretari i përgjithshëm i OKB-së, Antonio Guterres, në një mesazh për mbylljen e COP27 në Sharm el-Sheikh.
Cop27 pranon se ruajtja e objektivit prej 1.5 gradë kërkon një reduktim prej 43% të emetimeve deri në vitin 2030 krahasuar me vitin 2019. Megjithatë, me angazhimet aktuale të dekarbonizimit, ulja e emetimeve do të ishte vetëm 0.3% deri në vitin 2030 krahasuar me 2019.
Për përshtatjen ndaj ngrohjes globale, dokumenti kërkon rritjen e fondeve dhe studimin e mundësisë së dyfishimit të tyre (në Glasgoë u fol direkt për dyfishimin e tyre). Cop27 beson se për të arritur emetimet neto zero në vitin 2050 është e nevojshme të investohen deri në vitin 2030 rreth 4000 miliardë dollarë në vit në burime të rinovueshme dhe 4-6000 miliardë dollarë të tjerë në një ekonomi të bazuar në emetim./Opinion.al
