Në komentin e tij për arrestimin e kryebashkiakut Erion Veliaj, Artan Hoxha u shpreh në emisionin “Opinion” në Tv Klan se do të ketë ndikim politik. Ai tha se ky arrestim ka sjellë formulimin e një teorie të tretë, bazuar në çfarë ka dëgjuar nga kolegët. Sipas Hoxhës, me arrestimin e Veliajt SPAK hyn në zgjedhje kundër Partisë Socialiste dhe Ramës, në favor të Berishës.
Artan Hoxha: Sistemi i bashkisë së Tiranës duket qartë që është një sistem i molepsur në gjerësi dhe thellësi në korrupsion dhe në keqpërdorim të tij për qëllime politike. Bie dakord me Buzhalën që duket se Erion Veliaj nga i plagosur rëndë është i vrarë politikisht.
Blendi Fevziu: Politikisht.
Artan Hoxha: Kjo ka pasoja në politikën shqiptare. Vini re, arrestimi i Veliajt sot i ka dhënë jetë një teorie të tretë mbi pyetjen çfarë është SPAK-u dhe GJKKO? Teoria e tretë që e dëgjova nga disa kolegë tanët kryesisht me prirje majtas është që SPAK sot është futur në zgjedhje rëndë kundër Partisë Socialiste dhe Edi Ramës në favor të Berishës për shkak se është ndikuar nga ndryshimet e politikës në Amerikë ku iu dha sinjali i parë me këto fondet e USAID-it. Unë po referoj këtu me tri fjalë çfarë dëgjova në gjithë emisionet e mbrëmjes nga kolegët tanë majtas.
“Kjo për mua nuk ka ndodhur, por s’do të thotë që s’do të ndodhë së shpejti”, përmbylli Hoxha.
