Ministria e Arsimit ende nuk ka dhënë një deklaratë zyrtare në lidhje me asfiksimin e dhjetra nxënësve të një shkolle të mesme në Shupenzë të Bulqizës.
Mësohet se numri ka arritur në 50 nxënës, të cilët u ndjenë keq dhe u asfiksuan gjatë orës së mësimit, për shkak se në godinë u përhap tymi i kaldajës.
Burime të Opinion.al, thanë se 19 nxënës janë në gjendje më të rëndë dhe janë shtruar në spitalin rajonal të Peshkopisë.
Ndërsa, pjesa tjetër, prej 28 vetësh ndodhen në spitalin e Bulqizës.
Deri në këto çaste i vetmi reagim zyrtar është i Ministrisë së Shëndetësisë që ka vënë në dispozicion dy helikopterë për transportin e fëmijëve drejt Tiranës, nëse do të lindë nevoja.
Nga ana tjetër, Ministria e Arsimit nuk ka asnjë reagim për ngjarjen.
Prej disa orësh që kur ngjarja ka dalë në media, Lindita Nikolla ka heshtur.
Sipas policisë, ngjarja ndodhi në momentin që janë ndezur kaldajat me lëndë drusore për ngrohjen e ambientit dhe oxhaku i shkollës ka qenë i bllokuar.
Për pasojë tymi është shpërndarë në ambientet e brendshme të shkollës duke shkaktuar ndotje të ambientit. Grupi hetimor vijon punën për zbardhjen e plotë të ngjarjes.
