Të 28 vendet anëtare të BE-së arritën sot një marrëveshje me Ankaranë sipas të cilës të gjithë migrantët që vijnë në ishujt grekë duke filluar nga e diela do të rikthehen drejt Turqisë, njoftoi presidenti i Këshillit Evropian, Donald Tusk.
“Marrëveshje unanime mes të gjithë krerëve të shteteve dhe qeverive të BE-së dhe të kryeministrit turk Ahmet Davutoglu”, njoftoi Tusk në Twitter.
Në këmbim të një bashkëpunimi më të lartë të Turqisë në çështjen migratore, Evropianët pranuan të përshpejtojnë liberalizimin e vizave për shtetasit turq, si dhe të rifillojnë negociatat për aderim duke hapur një kapitull të ri mbi financat dhe buxhetin.
Ata kanë pranuar gjithashtu, por me kushte, të japin një ndihmë të re financiare ndaj Turqisë, që do të dyfishojë ndihmën prej tre miliardë, tashmë të premtuar, për të përmirësuar jetën e 2,7 milionë refugjatëve sirianë në Turqi.
Evropianët angazhohen gjithashtu, që për çdo sirian të kthyer në Turqi, do të marrin në BE një sirian tjetër në mënyrë legale. Ky dispozitiv aktualisht ka një nivel maksimal prej 72 000 migrantësh gjithsej.
