Policia e Shkodrës ka vënë në pranga trafikantin e makinave luksoze, të sekuestruara gjatë një operacioni më 7 Prill.
I ndaluari është 25 – vjeçari Ritvan Hasaj, nga Malësia e Madhe.
Burime zyrtare nga policia bëjnëme dije se, në vijim të operacionit të koduar “Luks” , ku Specialistët e Sektorit Kundër Trafiqeve të Paligjshme sekuestruan mjete luksoze, është bërë e mundur ndalimi i 25 – vjeçarit, i cili ishte shpallur në kërkim.
Mbi të rëndon akuza për veprën penale të “trafikimit të mjeteve motorike”.
Më datë 7 Prill, Policia e Shkodrës bllokoi 19 mjete luksoze, si dhe arrestoi 11 persona, si pjesë të trafikut ndërkombëtar të mjeteve të vjedhura.
Sipas policisë, makinat kapnin vlerën e qindra-mijëra eurove, ndërsa ato rezultojnë të vjedhura në vende të ndryshme, si Mali i Zi, Bosnje, Kroaci, Itali e Francë dhe kanë hyrë në Shqipëri me numra shasie të ndryshuara nëpërmjet Pikës së Kalimit Kufitare të Hanit Hotit./Klan
