41-vjeçari kosovar, Bujar Fandaj i cili akuzohet se vrau me thikë 27-vjeçaren Vanessa Ballan, në hyrje të shtëpisë së saj, është arrestuar në orët e vona të së martës.
Ngjarja e rëndë ndodhi të martën në Spineda, Riese Pio X, një komunë me 10 mijë banorë që ndodhet rreth 40 minuta larg Treviso-s.
Mësohet se e reja punonte si arkëtare në një supermarket.
Autor i dyshuar i këtij krimi është Bujar Fandaj, një 41-vjeçar nga Kosova, i cili u arrestua disa orë pas krimit, pranë shtëpisë së tij në Altivole.
Sipas Corriere della Sera, 41-vjeçari dyshohet se hyri me forcë në shtëpinë e viktimës duke e sulmuar gruan shtatzënë e cila ndodhej ende me pizhame.
Mësohet se viktima dhe vrasësi njiheshin. Ata raportohet se kishin pasur një lidhje të shkurtër dashurie në të shkuarën.
Gjatë javëve të fundit, ai e përndiqte, duke i shkuar në vendin e punës, pas kësaj ngjarje ajo edhe e kishte denoncuar.
