Është arrestuar sërish në Tokio ish-administratori i kompanisë së automobilave Nissan, Carlos Ghosn i cili ishte liruar me kusht. Arrestimi erdhi pas akuzave të reja ndaj 65-vjeçarit. Sipas mediave vendase, autoritetet e arrestuan në orët e para të mëngjesit të së enjtes në shtëpinë e tij të përkohshme në Tokio.
Carlos Ghosn u lirua një muaj më parë pas 100 ditësh ndalim. Akuzat e reja ndaj tij lidhen me transferimin e 32 milionë eurosh fonde nga llogaritë e Nissan një distributori në Oman. Me anë të këtyre parave, do të blihej një jaht luksoz për Ghosn dhe familjarët e tij.
Ai ka refuzuar çdo akuzë e madje të mërkurën, me anë të një llogarie të re në Twitter, ka thënë se është i gatshëm të tregojë të vërtetën për gjithçka që po ndodh në një konferencë për shtyp të programuar më 11 prill.
Përveç kësaj akuze, Carlos Ghosn akuzohet edhe për thyerje besimi dhe transaksione financiare të paligjshme./Opinion.al
