Policia e Tiranës ka finalizuar operacionin policor të koduar “Expiration”, i zhvilluar nga Seksioni për Hetimin e Krimit Ekonomik dhe Financiar, në bashkëpunim me Autoritetin Kombëtar të Ushqimit (AKU).
Si rezultat i hetimeve, u arrestua shtetasi Enea Davidhi, 35 vjeç, banues në fshatin Krutje, Lushnjë, i cili dyshohet se tregtonte produkte bujqësore për mbrojtjen e bimëve me afate skadence të manipuluara.
Sipas Policisë, në magazinën e këtij shtetasi në Fushë-Krujë u gjet një sasi e konsiderueshme produktesh, të cilave ai iu kishte shtyrë artificialisht afatin e përdorimit, nga dy në tre vjet pas datës së prodhimit, duke u vendosur etiketa të reja me të dhëna të falsifikuara.
Gjatë kontrollit, shërbimet policore në bashkëpunim me inspektorët e AKU-së sekuestruan edhe qindra etiketa ngjitëse me afate të ndryshuara përdorimi, që do të përdoreshin për të fshehur skadencën e vërtetë të produkteve.
Burime zyrtare bënë të ditur se materiali procedurial i është kaluar Prokurorisë pranë Gjykatës së Shkallës së Parë të Juridiksionit të Përgjithshëm Tiranë për veprime të mëtejshme hetimore.
