Një 30-vjeçar është arrestuar nga policia si autor i dyshuar i vrasjes së shtetasit Emiljano Boçi më 14 janar të 2018-ës në Tiranë.
Policia e Tiranës tha se në pranga ka rënë shtetasi Tori (Hektor) Xhecuka, 30-vjeç, lindur në Burrel dhe banues në Tiranë.
Sipas policisë, 30 vjeçari është autor i dyshuar i ngjarjes së ndodhur në datën 14 Janar 2018 në rrugën “Shefqet Musaraj”, ku mbeti i vrarë shtetasi Emiljano Boçi, si dhe autor i dyshuar i “Vrasjes së mbetur në Tentativë” të shtetasit M.D.
“Identifikimi i autorit të dyshuar erdhi pas një hetimi disa mujor me metoda speciale të hetimit nga Seksioni për Krimet e Rënda në Drejtorinë Vendore të Policisë Tiranë në bashkëpunim me Prokurorinë e Rrethit Gjyqësor Tiranë”,-citohet nga deklarata.
Ai akuzohet për veprën penale të “Vrasjes me paramendim” e kryer në bashkëpunim dhe të “ Prodhimit dhe mbajtjes së armëve luftarake”.
Policia thotë se për arsye hetimi në funksion të zbardhjes së plotë të kësaj ngjarje, nuk bëhen me dije detaje të tjera.
Viktima, Emiljano Boçi njihej edhe si Roland Boçi, person me precedentë penalë, ndërsa i plagosur mbeti shoku i tij Melvin Disha 27 vjeç, të cilët kanë qenë së bashku në një lokal.
Sapo ata kanë dalë dhe kanë hipur në makinë, ndaj tyre është qëlluar disa herë me armë zjarri.
Dëshmitarët nga vendi i ngjarjes në zonën e “21 Dhjetorit”, i thanë policisë se kanë parë një motor që ka lëvizur shpejt në zonë në momentin e sulmit me armë ndaj ty të rinjve.
Ndërkohë në vendin e ngjarjes policia ka gjetur dy personat të plagosur brenda në makinë. Roland Boçi, 32 vjeç, ka gjetur vdekjen sapo ka mbërritur në spital, ndërsa miku i tij Melvin Disha arriti të mbijetonte.
Të dy personat që ranë pre e atentatit ishin kthyer në Tiranë nga Gjermania pak ditë para festave të fundvitit të shkuar. Ndërsa viktima pak vite më parë kishte dalë nga burgu.
Roland Boçi, i njohur edhe me emrin Emiljano, ishte dënuar me 2 vjet burg për plagosje disa vite më parë.
Në 26 korrik 2010 ai ishte përfshirë në një konflikt me dy persona ndaj të cilëve kishte qëlluar me armë duke u shkaktuar dëmtime pas një debatit në lokal.
