Dy persona të kërkuar nga Italia si anëtarë të një organizatë kriminale të trafikut të drogës janë arrestuar në Lezhë gjatë një aksioni anti-drogë të koduar “Rugatino”.
Pas shkëmbimit të informacionit me Policinë Italiane dhe Interpol Romën, u arrestuan Tonin Kameri alias Aleks Ionescu. 44 vjeç dhe Pavlin Bregaj alias Pavlin Tuku 32 vjeç, të dy banues në Lezhë.
Tonin Kameri kishte përdorur identitetin e kushëririt të tij për t’iu shmangur policisë italiane. Autoritetet shqiptare e shoqëruan në polici edhe kushëririn e tij, D.M. alias D.K. 48 vjeç, pasi dyshohet se e lejoi me vullnet kushëririn e tij që t’i përdorte identitetin.
Dy të arrestuarit kërkohen nga Italia dhe ndaj tyre ka masë sigurie arrest në burg për veprën penale “Organizata kriminale me qëllim trafikimin e lëndëve narkotike”.
Të dy ata, së bashku me 7 persona të tjerë që janë të arrestuar tashmë nga Policia e Italisë, dyshohet se janë pjesëtarë të një organizate kriminale për trafikimin e kokainës, organizatë me veprimtari në Itali. Gjatë zhvillimit të këtij operacioni, Policia e Italisë ka sekuestruar në cilësinë e provës materiale rreth 7 kg lëndë narkotike kokainë.
Interpol Tirana dhe Interpol Roma vijojnë bashkëpunimin me qëllim ekstradimin e këtyre shtetasve drejt Italisë.
