Policia e Bulqizës pas një operacioni ka arritur të arrestojë nënë e bir për armë pa leje.
Operacioni ishte i koduar “Gjeologu”dhe nisi pas informacioneve të marra në rrugë operative se në një automjet tip “Benz” që lëvizte në lagjen Gjeologu të qytetit Bulqizë kishte armë zjarri.
Menjëherë kanë bërë bllokimin e automjetit “Benz” me targa AA 211 HM.
Nga kontrolli i ushtruar nga Policia në automjetin në përdorim të shtetasit Luan Ternova, 40 vjeç, u gjet dhe u sekuestrua brenda një çante dore që ndodhej në makinë një armë zjarri Pistoletë TT model 54 si dhe një krehër me 8 fishekë.
Në momentin që Policia do ushtronte kontroll, çantën e ka marrë në dorë shtetasja Sarie Ternova, 58 vjeçe me qëllim shmangien e kontrollit.
Shtetasit e lartpërmendur (nënë e bir) Luan Ternova dhe Sarie Ternova u arrestuan në flagrancë për veprën penale “Mbajtja pa leje e armeve luftarake” kryer ne bashkëpunim.
Shtetasi Luan Ternova ka qenë i dënuar më parë për Vjedhje banesash në shtetin Francez dhe ka vetëm një muaj që kishte dalë nga burgu dhe ishte deportuar në Shqipëri nga Franca.
Theksojme se para disa muajsh nga Policia e Bulqizës është arrestuar edhe vëllai i shtetasit Luan Ternova, Fadil Ternova( i njohur si i forti i Bulqizës) për armëmbajtje pa leje.
