Në mediat e Kosovës sot doli lajmi i arrestimit të personit që denoncoi vëllanë e ministrit të Brendshëm, Agron Xhafaj. Albert Veliaj (Babalja) është dëshmitari X i audipërgjimit të publikuar nga PD. Më tej, lajmi është konfirmuar nga zëdhënësi i policisë së Kosovës, i cili thotë:
“Mund të ju konfirmojmë se Policia e Kosovës bazuar në autorizimet ligjore me dt. 27.05.2018, ka ndaluar dy shtetas të Republikës së Shqipërisë. Të ndaluarit janë trajtuar sipas procedurave të parapara ligjore”. Në këtë njoftim të shkurtër bëhet e ditur nuk thuhet arsyeja pse është ndaluar Albert Veliu dhe i biri 22 vjecar.
Veliu është personi që bëri përgjimin e publikuar në selinë e PD dhe më pas pranoi se njeriu me të cilin fliste për pazaret e drogës, është Agron Xhafaj. Ai u mor në pyetje në prokurori, por për të nuk kishte asnjë akuzë në lidhje me ngjarjen.
Opinion.al u interesua pranë prokurorisë shqiptare. Zëdhënësi, Denion Ndrenika tha se nuk ka asnjë urdhër ndalimi apo urdhër arresti për personin në fjalë.
“Prokuroria për Krime te Renda po kryen hetime ne procedimin penal Nr. 95/2018 regjistruar per vepren penale te “Trafikimit te narkotikeve” parashikuar nga neni 283/a i Kodit Penal. Ndaj shtetasit Albert Veliu nuk ka urdher ndalimi apo urdher per ekzekutimin e ndonje vendimi te Gjykates per Krime te Renda”, tha zëdhënësi i prokurorisë.
Atëherë, kush e urdhëroi ndalimin e dëshmitarit X në Kosovë dhe të birit?! Pasi policia e Kosovës thotë se ka vepruar në bazë të kërkesës së autoriteteve shqiptare, ndërsa këto të fundit nuk e pranojnë.
