Pak minuta para niste mbledhja e kryesisë së Partisë Socialiste këtë të hënë, një person me precendent të mëparshëm penalë u kap para selisë rozë, me një armë pa leje dhe me një shumë të madhe parash.
Bëhet fjalë për Vladimir Gjutën, i arrestuar si i dyshuar për hedhjen në erë me tritol të farmacisë së babait të ish–ministrit të brendshëm Saimir Tahiri, në vitin 2015. Ai u ndalua nga efektivët e Gardës, që ndodheshin aty për të garantuar sigurinë e Kryeministrit, i cili në atë kohë ndodhej në selinë e Partisë Socialiste, për të drejtuar mbledhjen.
Gazetari Spartak Koka ka treguar në emisionin Opinion detaje për këtë arrestim. “Ka qenë një arrestim rastësor, nuk e kanë njohur. Gjuta ka qenë afër një punonjës të Gardës. Ndërkohë dy efektivë policie kanë dyshuar dhe i kanë bërë me shenjë oficerit të Gardës: Është i juaj? Pasi kanë marrë mohimin e Gardës, më pas është shtrirë të tokë dhe është arrestuar. Në trup i është gjetur një pistoletë Zastava. Pistoleta kishte 7 fishekë. I kanë gjetur dhe një thike në pjesën e prapme të trupit. Po ashtu i janë gjetur edhe 111 mijë euro në xhep si dhe gati 20 mijë paund. Po hetohet për këtë çështje… Sipas avokatëve ai ndodhej në pjesën e “Dollarit” dhe ndodhej për të këmbyer paratë. Nuk ka patur ndonjë qëllim për të kryer ndonjë akt ndaj politikanëve. Pistoletën e ka justifikuar për mbrojtje”, tha gazetari.
Pas mbledhjes së Kryesisë dhe pas kësaj ngjyerjeje, kryeministri Edi Rama është larguar me një makinë tip fuoristradë dhe jo me Mercedesin që përdor zakonisht.
Vladimir Gjuta u arrestua një muaj më parë pasi kishte rrahur me çekiç kushëririn e tij duke i shkaktuar dëmtime të rënda në fytyrë. Për shkak se i afërmi i tij është tërhequr nga denoncimi, gjykata vendosi që ai të hetohej në gjendje të lirë./ Opinion.al
