Ish-ministri i Drejtësisë, Gazmend Bardhi, ka reaguar në lidhje me reagimin e Policisë së Shtetit për arrestimin e Edmond Begos në Greqi vetëm pak ditë më parë.
Përmes një shënimi të shkurtër në Facebook, Bardhi thellon dyshimet dhe akuzat ndaj deputetit socialist Taulant Balla, për lidhjen që ai ka me Edmond Begon, ish-dënuar për trafik droge, i arrestuar së fundmi në Greqi.
“Meqë policia i është futur edhe verifikimit përmes sistemit TIMS, të tregojë se mos ka qenë edhe Taulant Balla për pushime në Korfuz në të njëjtën kohë“,-shkruan ai.
Ish-ministri i Drejtësisë, me nota ironike thekson se pas dy ditësh policia u zgjua nga gjumi për të sqaruar rrethanat e ngjarjes në lidhje me arrestimin e Begos.
Sipas tij, a mund të tregojë policia greke me cilin emër dhe mbi bazën e cilit urdhër kërkimi ndërkombëtar e ka arrestuar dhe për çfarë arsye e mban ende në burg.
Ndërkaq, Bardhi shton me ironi se shpresojmë që për përgjigjen e radhës, qytetarët t’mos presin edhe 2 ditë të tjera.
