Në një dalje për mediat, kreu i Policisë së Shtetit, Muhamet Rrumbullaku foli mbi arrestimin e kandidatit të Koalicionit “Bashkë Fitojmë” për Himarën, Fredi Belerit.
I pyetur nga gazetarët për arrestimin e Belerit, Rrumbullaku tha se veprimet e policisë sa i takon arrestimit të tij, janë të autorizuara nga prokurori i çështjes në fjalë.
Duke mos dhënë shumë detaje, ai theksoi se si drejtues i policisë e ka të ndaluar të japë shpjegime mbi faktet dhe provat mbi këtë rast.
“Në lidhje me rastin kemi pasur një deklaratë nga drejtuesi i prokurorisë së Vlorës. Çështje që lidhen me hetimin dhe çështjet e tjera është në tagrin e prokurorit për të adresuar dhe për të dhënë shpjegime të mëtejshme. Unë e kam të ndaluar si Drejtor i Përgjithshëm i Policisë së Shtetit për të dhënë shpjegime mbi faktet dhe provat”.
“Por ju siguroj që të gjitha veprimet e policisë në lidhje me rastin janë veprime të autorizuara nga prokurori në kushtet e realizimit të një fakti kriminal, për të cilën autorizimet e marra nga prokurori dhe kur vërtetohet konsumimi i veprave penale të tilla, Policia e Shtetit është e detyruar që të ndërhyjë.”
Fredi Beleriu u arrestua në orët e para të mëngjesit të kësaj të premteje me akuzën për blerje votash e ndërsa në kuadër të operacionit të quajtur “Matrix” u sekuestruan në cilësinë e provës materiale 40 mijë lekë që mendohet se i ka marrë në këmbim të 8 votave./Opinion.al
