Policia e Durrësit, ka njoftuar nëpërmjet një komunikate për shtyp, arrestimin mbrëmjen e djeshme rreth orës 23.30, të shtetasve R.D.,38 vjeç, dhe H.B., 40 vjeç.
Arrestimi i tyre sipas Policisë u bë pasi rreth orës 17.00, këta persona në hyrje të Portit, në bashkëpunim me një person tjetër ende të paidentifikuar dyshohet se kanë goditur me sende të forta në kokë, një nga punonjësit e shërbimit të Autoritetit Portual, i cili po merr ndihmë në spital.
Sipas Policisë dyshohet se mjeti më të cilin punonjësi i portit është goditur në kokë është tyta e një arme.
Ndërkohë që Policia po punon për identifikimin dhe kapjen e autorit të tretë të kësaj ngjarje, agresorët do të akuzohen për veprat penale “Plagosja e rëndë me dashje”, “Mbajtja pa leje dhe prodhimi i armëve, armëve shpërthyese dhe municionit” si edhe “Goditja për shkak të detyrës”, kryer në bashkëpunim.
Kjo ngjarje brenda hapësirës së Portit u denoncua më herët në një postim në profilin e tij në facebook edhe nga ish-kryeministri, Sali Berisha. I cili iu referua mesazhit të ardhur nga qytetari dixhital.
“Po fshihet një krim i shëmtuar nga narkozyrtarët! Lexoni mesazhin e punonjësit dixhital. sb
Përshëndetje doktor. Dje në mbrëmje ka ndodhur një ngjarje e pazakontë, ku bandat e drejtorit të Portit të Durrësit Agron (Genti)Tare, kan rrahur dhe goditur me pistoletë një punonjës të Forcave të Sigurisë Portuale. Punonjësi ndodhet në gjendje kritike për jetën në Spitalin Ushtarak. Drejtori narkoman i portit i cili e ka kthyer zyrën në një qendër të pirjes së kokainës. Së bashku me bandat e tij dhe Policinë e Shtetit po tentojnë ta mbajnë të fshehur si ngjarje……. Ju lutem anonim”, shkruan Berisha.
