Punonjësit e OSHEE Krujë dhe Fushë-Krujë kanë pezulluar punën për një periudhë kohe pa afat.
Janë rreth 70 punonjës të cilët mëngjesin e sotëm kanë vendosur të mos fillojnë punën, në shenjë proteste, pasi sipas tyre është e disfata herë që bien pre e arrestimeve tendencioze nga ana e policisë.
Shefi i ekipit të OSHEE, Bardhyl Sula dhe shefi i sektorit teknik, Migen Masha, kanë dhënë një prononcim për media, ku kanë thënë se në qarkun Krujë, sa herë që zbulohen shtëpi bari apo sera kanabisi, vihen para përgjegjësisë punonjësit e OSHEE-së, të cilët arrijnë t’i gjurmojnë përmes lidhjeve të paligjshme të energjisë elektrike.
Ata thonë se ditën e djeshme, pasi kanë zbuluar një serë me fidanë kanabisi (Ende e pa raportuar nga ana e policisë për mediat) janë arrestuar dy elektriciste.
Sula thotë se po penalizohen punonjës të OSHEE me argumentin që bashkëpunojnë me kriminele, por sipas tij, kjo nuk është e vërtetë.
“Dje kanë arrestuar grupin e punonjësve, 2 punonjës të OSHEE. Ne jemi 70 punonjës dhe ne po penalizohemi dita ditës. Arsyet janë shtëpitë e barit që i organizojnë njerëzit e krimit dhe arrestohen punonjësit e OSHEE. Ndihemi të kërcënuar. Kjo nuk është hera e parë, ne penalizohemi me argumentin që bashkëpunojmë me ta, por kjo nuk është e vërtetë. Ne vijmë në punë për të mbajtur familjen me bukë, për t’u ushqyer, ne çdo ditë jemi të kërcënuar kur vijmë në punë. Ne kërcënohemi kot, familjarët janë të indinjuar.”- tha ai.
Edhe Migen Masha thotë se OSHEE ka qenë gjithnjë në bashkëpunim me policinë e shtetit.
“OSHEE ka qenë gjithnjë me policinë e shtetit. Nuk sulmon dhe nuk zbulon autorët e vërtetë të shtëpive të barit. Përveç abonentëve që kanë nevojë, të sëmurë, që kanë fatkeqësi ne nuk do bashkëpunojmë më me policinë dhe nuk do ofrojmë më ndihmë.”- tha Masha.
