TIRANË- Dy prokurorë u arrestuan në pak ditë në Fier dhe Krujë. Sakaq, Ylli Manjani, ministër i Drejtësisë, thonë se ka një listë me prokurorë e gjyqtarë që po hetohen nga inspektoratet e Ministrisë së Drejtësisë dhe Këshillit të Lartë të Drejtësisë për parregullsi.
“Ka disa vështirësi ligjore, ka disa vështirësi teknike por sidoqoftë ka një listë jo të vogël më gjyqtarë në këtë rast që inspektohen nga te dyja inspektoratet jo thjesht nga inspektorati i Ministrisë së Drejtësisë”, tha Manjani.
Ai tha se mbështet kryeprokurorin Llalla në punën e tij. “Nuk kam ndonjë konstatim ekstra, nuk kam ndonjë konstatim të veçantë për x prokuror apo për y prokuror përfshirë këtu dhe Prokurorin e Përgjithshëm i cili është në krye të detyrës dhe ka gjithë mbështetjen time për çdo lloj ndërhyrje të kësaj natyre në elementë si brenda radhëve të saj po ashtu në radhët e gjyqësorit, gjithashtu dhe në radhët e ekzekutivit kudo qoftë dhe për çfarë do lloj arsye”, u shpreh ministri i Drejtësisë në një intervistë për Report TV.
