Kanë qenë dy indicie ato të cilat kanë nisur hetimet të cilat përfunduan më pas me furtunën e arrestimeve të ndodhur në Lezhë, ku në bangën e të akuzuarve për tjetërsim të pronave janë zyrtarë të lartë të qytetit midis tyre edhe kreu i bashkisë, Fran Frrokaj. Hetimeve e filluara nga nga prokurorët Simon Pashuku dhe Erjon Shehaj, kanë nisur pasi një shtetas ka vërejtur se prona e tij nuk është më prona e tij të cilën e kishte përfituar nga Komisioni i Kthimit dhe Kompensimit të Pronave.
Hetimi i parë ka nisur pas denoncimit në shtator të vitit 2017 të shtetasit Pjetër Prela, i cili ka pretenduar se i është tjetërsuar sipërfaqja prej 234,548 m2 tokë në zonën bregdetare të Shëngjinit.
Pas referimit të çështjes, Prokuroria e Lezhës nisi procedimin penal për veprën “Falsifikim i dokumenteve”.
Ndërsa më 16 shkurt 2018 Prokuroria e Lezhës ngriti dhe akuzën e “shpërdorimit të detyrës” për zyrtarët që ishin nën hetim.
Në kallëzimin e shtetasit Pjetër Prela, ai pretendon është një nga trashëgimtarët e ligjshëm të të ndjerit Gjergj Mark Prela, për të cilin Komisioni i Kthimit dhe Kompensimit të Pronave Qarku Lezhë, me anë të vendimit nr. 28, datë 19.09.2011, ka vendosur: t’u njohë trashëgimtarëve ligjorë të të ndjerit Gjergj Mark Prela.
Kallëzues Pjetër Prela ka thënë se ngjitur me pasurinë e tij, persona të ndryshëm me dokumente të falsifikuara kanë bërë regjistrimin e një sipërfaqeje toke, e cila është shkëmb dhe rërë duke e paraqitur si tokë “arë” dhe e kanë regjistruar në Hipotekën e Lezhës në një kohë që toka është rërë dhe shkëmb.
Në hetimin e dytë, Prokuroria e Lezhës e ka nisur hetimin pas kallëzimit të shtetasit Gjek Çelaj, i cili më datë 15.09.2017, ka regjistruar edhe procedimin penal nr. 671, viti 2017, për veprat penale të “Falsifikimi i dokumenteve” dhe “Shpërdorim detyre”. Në bazë të kallëzimit të Gjek Çelaj, ndër të tjera ka denoncuar se familja e tij ka banuar prej kohësh në vendin e quajtur “Mali i Rencit”, Shëngjin.
Gjyshi i tij, i ndjeri Gjon Preka ka pasur në pronësi të tij pra vitit 1945, në Malin e Rencit, një sipërfaqe toke prej 12 dynymë tokë buke si dhe një sipërfaqe prej 150 dynymë livadhe dhe kullota, fakte këto të pasqyruara në dokumentin nr. 2293/1, datë 04.06.2014, të lëshuar nga Arkivi Qendror Shtetëror. Pas njohjes së pronës, trashëgimtarët e të ndjerit Gjon Prek Çelaj kanë ndjekur rrugën ligjore për kthimin fizik të saj, proces i cili nuk ka përfunduar akoma.
Pavarësisht kësaj, kallëzuesi para disa ditësh ka mësuar se prona, e cila është e familjes së tij dhe për të cilën është në proces gjyqësor për kthimin fizik të saj, me anë të dokumenteve të falsifikuara ishte regjistruar në pronësi të disa personave, të cilët pretendojnë se kanë përfituar në bazë të ligjit 7501.
Nisur nga ky fakt, Prokuroria e Lezhës ka bashkëpunuar të dy procedimet penale në një të vetëm.
