Kryeministri Edi Rama ka reaguar në Twitter, lidhur me ndalimin e 4 personave për grabitjen në Rinas, duke e cilësuar si një zhvillim inkurajues për ndalimin dhe ndëshkimit e të gjithë autorëve të krimit. Sipas tij pavarësisht baltës që po hidhet, policia po bën punën e saj.
“Ndalimi i 4 personave të përfshirë në grabitjen e aeroportit,një zhvillim inkurajues në rrugën e ndalimit dhe ndëshkimit ligjor të të gjithë autorëve të krimit. Policia e Shtetit duhet të provojë përditë se sa më shumë sulmohet e baltoset,aq më shumë rritet forca e saj goditëse“, shkruan kryeministri Rama.
Policia thotë se bazë të veprimeve hetimore të kryera dhe informacioneve të marra në rrugë operative si dhe provave të siguruara gjatë hetimit është bërë i mundur ndalimi i katër personave: Oltion Veseli, 38 vjeç, banues në Krujë; Alkond Bengasi 34 vjeç, banues në Elbasan, me banim të përkohshëm në Tiranë, i dënuar më parë për “Prodhim dhe shitje narkotikësh”; Renaldo Sula, 25 vjeç, lindur dhe banues në Elbasan dhe Saimir Çela (i cili njihet edhe me pseudonimin Tale) 28 vjeç, lindur në Kajan, Elbasan.
Gjithashtu gjatë kontrolleve janë gjetur dhe sekuestruar në cilësinë e provës materiale, prova të shumta të cilat do të shërbejnë për thellimin e hetimeve dhe zbardhjen e plotë të ngjarjes. Dy prej tyre dyshohet se kanë modifikuar në një servis furgonin me mbishkrimin “Hetimi Tatimor” që u përdor nga Admir Murataj dhe bashkëpunëtoret e tij./Opinion.al
