Një azilkërkues 22-vjeçar, shqiptar, me status të refuzuar ka ikur nga burgu për dëbim që ndodhet në Aeroportin e Hamburgut.
Policia theksoi se fillimisht ishte krejt e paqartë se si 22-vjeçari arriti të shpërthente rrethimin me tela me gjemba të burgut, por më pas u kuptua se ai kishte ndihmën e një tjetër azilkërkuesi me shtetësi algjeriane, 24-vjeç,-shkruan welt.de.
Sipas policisë, shqiptari e kishte përgatitur mirë arratisjen, shtrati i tij në dhomën e burgut ishte maskuar ashtu që të dukej sikur ai ende ishte duke fjetur aty.
Menjëherë pasi u konstatua zhdukja e tij, përgjegjësit e burgut njoftuan autoritetet e aeroportit, pasi që ekzistonte rreziku që ai të ikte përmes pistës së aeroportit.
Mësohet se rreth orës 20:15 është bllokuar qarkullimi i aeroplaneve në mënyrë që të hulumtohej terreni. Rreth orës 21:35 ka përfunduar kërkimi në aeroport dhe ka vazhduar puna normale.
Azilkërkuesi shqiptar ende vazhdon të jetë në kërkim nga autoritetet gjermane.
